🗣 ciaqkhor

🗣 Y kuisielaang ciaqkhor, m bad hiafngsiu`koex.
伊規世人食苦，毋捌享受過。

🗣 Khaiky ee laang sinkhor hurntaux, sixsex ma taux kankhor u tiøh, iugoaan kutlat teq zøx, suxgiap sengkofng liawau kviafswn biern ciaqkhor køq gaau hiafngsiu, biern goaxkuo soaq "svaf tai liabzeg, cidtai khengkhofng", ho laang kafmkhaix.
開基的人辛苦奮鬥，序細嘛鬥艱苦有著，猶原骨力咧做，事業成功了後囝孫免食苦閣𠢕享受，免偌久煞「三代粒積，一代窮空」，予人感慨。

🗣 Lie na køq korng be thviaf, goansexng pud kae, yau ciaqkhor`ee si kaki.
你若閣講袂聽，原性不改，以後食苦的是家己。

🗣 Sioggie korng, "Siaolieen bexhiao sviu, ciaqlau mxcviaviu. " Citmar bøo kanghw ma biern hoanlør, na kherng ciaqkhor, khix citgiap hurnliexnpafn siuxhuxn øh kisut, tø biern kviakvix ciaqlau phvae koeajit.
俗語講：「少年袂曉想，食老毋成樣。」這馬無工夫嘛免煩惱，若肯食苦，去職業訓練班受訓學技術，就免驚見食老歹過日。

🗣 Ciaqkhor torngzøx ciaqpor.
食苦當做食補。