🗣 khvoax

🗣 Abeeng go hoex`aq, kofng'oe iao korng be zhengzhør, zhuopvy khvoartiøh yn lauxpe ciaq hoanlør, tø korng, "Toaxkeq kef ban thii, afn`laq! "
阿明五歲矣，講話猶講袂清楚，厝邊看著 老爸遮煩惱，就講：「大格雞慢啼，安啦！」

🗣 Abeeng ka ahviaf thør tuo bea`laai ee siesiuo'ar, køq ka acie thør pysaix viaa`laai ee ciofngphirn, tø khix ho amar ka me korng "bagciw koax tawkaix, khvoax laang mih tø aix".
阿明共阿兄討拄買來的四秀仔，閣共阿姊討比賽贏來的獎品，就去予阿媽共罵講「目睭掛斗概，看人物就愛」。

🗣 Abuun`ar bøseaji ka iaam khvoarzøx peqthngg, ciuxafnnef khad khix zhafm kapy, sidzai si "bagciw hoehoef, puar khvoarzøx zhaekoef".
阿文仔無細膩共鹽看做白糖，就按呢𣁳去摻咖啡，實在是「目睭花花，匏仔看做菜瓜」。

🗣 Ahoef`ar bagthaau koaan, "bagciw khvoarkoaan, bøo khvoarke", larn cittin zngkhaf ee gyn'afphvoa, citmar lorng ho y khvoarbøo bagte.
阿花仔目頭懸，「目睭看懸，無看低」，咱這陣庄跤的囡仔伴，這馬攏予伊看無目地。

🗣 Akog`ar ciog tikøsiin`ee, khvoartiøh suie zabor zhuienoa tø tidtit laau.
阿國仔足豬哥神的，看著媠查某喙瀾就直直流。

🗣 Akofng saxng kaux pvexvi ee sii suijieen iao zay laang, mxkøq be kofng'oe ma be tyntang, kannaf tiaxmtiam khvoax pvexzhngpvy ee laang, cincviax si "bagciw kimkym laang siongtiong".
阿公送到病院的時雖然猶知人，毋過袂講話嘛袂振動，干焦恬恬看病床邊的人，真正是「目睭金金人傷重」。

🗣 Apaq ee sinzaai tiongpaxntiongpan, khvoax`khylaai be puii ma bøo goa sarn.
阿爸的身材中範中範，看起來袂肥嘛無偌瘦。